Бидний тухай
Багш ажилтан
Санхүүгийн шинжилгээний онол, арга зүйн үндсийг судалж, санхүүгийн тайлангийн шинжилгээ, үйл ажиллагааны шинжилгээ, эрсдэл өгөөжийн шинжилгээ, санхүүгийн хөшүүргийн шинжилгээ, капиталын бүтцийн шинжилгээ, ногдол ашгийн шинжилгээ, хөрөнгө оруулалтын шинжилгээний арга үзүүлэлтийг ашиглан бизнесийн байгууллагын санхүүгийн үйл ажиллагааг шинжлэх, санхүүгийн шинжилгээний тогтсон жишиг арга үзүүлэлтийн системийг ашиглан шинжилгээ тооцоолол хийх, түүнд тулгуурлан, үнэлгээ дүгнэлт өгөх; санхүүгийн ирээдүйн төлөв байдлыг тодорхойлох, таамаглах, богино болон урт хугацааны санхүүгийн төлөвлөгөө боловсруулахарга зүйн үндсийг судална.
Бизнесийн байгууллагын санхүүгийн үйл ажиллагааны шинжилгээг төрөл бүрийн аргаар хийж, өнөөгийн ба хэтийн төлөв байдалд үнэлгээ, дүгнэлт өгөх замаар санхүүгийн төлөвлөгөө боловсруулах арга зүй, дадлага, чадварыг эзэмшүүлэхэд оршино.
Санхүүгийн харилцаа, санхүүгийн систем, санхүүгийн зах зээлийн бүтэц, зохион байгуулалт, санхүүгийн зах зээлийн төрлүүд, санхүүгийн байгууллага болон зуучлагчид, санхүүгийн хэрэгслүүд, тэдгээрийн төрөл, ялгаа, зах зээлийн үнэлгээ; хөрөнгө оруулалтын шийдвэр гаргалт, хувь хүний санхүүгийн төлөвлөлт, хадгаламжийн төрөл, зээлийн эх үүсвэрийн сонголт, эрсдэл, түүний төрлүүд, эрсдлээс хамгаалах арга, төрийн санхүү, улсын төсвийн талаарх онолын асуудлуудыг судална.
Санхүүгийн үндэс хичээлийн хүрээнд санхүүгийн мөн чанар, зарчим,санхүүгийн зах зээл, санхүүгийн байгууллагуудын үйл ажиллагаа, санхүүгийн хэрэгслүүд, хөрөнгө оруулалт, эрсдлийн удирдлагын суурь ухагдахуун, нийгмийн даатгал, хувь хүний болон төрийн санхүүгийн үндсэн ойлголтуудыг судалснаар санхүүгийн цэгцтэй мэдлэг болон санхүүгийн оновчтой шийдвэр гаргах чадварыг эзэмших үндэс, суурийг тавихад оршино.
Уг хичээлээр Санхүүгийн менежментийн агуулга, мөн чанар,онолын үзэл баримтлал, үүрэг, зорилго болон Санхүүгийн менежментийн тулгуур ойлголтууд, Компаний хөгжлийн үе шат, бүтэц, зохион байгуулалт, Өгөөж эрсдэлийн үнэлгээ, Хувьцаа, бондын үнэлгээ, Капиталын өртгийн үнэлгээ ба санхүүгийн шийдвэр гаргалт, Капиталын бүтэц ба хөшүүрэг, Санхүүгийн шинжилгээ, Хөрөнгө оруулалтын төслийн үнэлгээг санхүүгийн шийдвэрт ашиглах, Ажлын капиталын менежментийн бодлого, Мөнгө ба ТБҮЦ-ны менежмент, Авлагын менежмент, Бараа материалын менежмент зэргийг дэлгэрэнгүй авч үзнэ. Аж ахуйн нэгж байгууллагын санхүүгийн тайлангийн үзүүлэлтүүдэд шинжилгээ хийн үнэлэлт дүгнэлт өгсөний үндсэн дээр үйлдвэрлэл, үйлчилгээний бусад талуудтай нягт холбоотойгоор санхүүгийн менежерийн шийдвэр гаргах арга зүйг дараах чиглэлүүдээр судлана. Үүнд: Мөнгөний цаг хугацааны үнэ цэнийн үзэл баримтлалд суурилан мөнгөний урсгалыг оновчтой зохион байгуулах, хөрөнгийг үйл ажилгааны циклд зөв байршуулах; Компанийн өгөөж, эрсдлийг тодорхойлж компанийн үнэ цэнийг нэмэгдүүлэхэд нөлөөлөхүйц үр дүнтэй шийдвэр гаргах; Санхүүжилтийн эх үүсвэр, түүний өртөгийг тооцож капиталын бүтцийн шийдвэрийн гаргалтуудыг оновчтой хийх, капиталын бүтцийн шийдвэр гаргалтанд хөшүүргийн нөлөөллийг тооцох; Үйл ажиллагааны, санхүүгийн болон нийт хөшүүргүүдийг тодорхойлж, тэдгээрийн мөн чанар, санхүүгийн удирдлагын шийдвэрт хэрэглэх хэрэглээг тооцох; Аж ахуйн нэгжийн үйл ажиллагааг санхүүгийн талаас нь шинжилж цаашдын бодлого, төлөвлөлтөнд ашиглах; Компаний хөрөнгө оруулалтын бодлого, капитал төсөвлөлтийг хийхдээ хөрөнгө оруулалтын мөнгөн урсгалуудыг таамаглах, хөрөнгө оруулалтын шийдвэр гаргалтын аргууд болох цэвэр өнөөгийн үнэ цэнийн арга (NPV),өгөөжийн дотоод нормын арга (IRR), эргэн төлөгдөх хугацааны арга (PP) болон бусад аргуудыг судлан тэдгээрийн онцлог уялдаа холбоог тодорхойлох; Ажлын капиталын ашиглалтын талаар оновчтой шийдвэр гаргах арга зүйн ойлголтуудыг өгөх зэрэг болно.
Уг хичээл нь эдийн засаг, бизнесийн удирдлагын чиглэлээр суралцагчдын мэргэжлийн заавал судлах суурь хичээлүүдийн нэг бөгөөд үндсэн зорилго нь оюутанд бизнесийн үйл ажиллагааны санхүүгийн байдалд мэргэжлийн үнэлгээ, дүгнэлт өгч, ирээдүйн чиг хандлагыг нь тодорхойлоход санхүүгийн оновчтой, зөв шийдвэр гаргах мэдлэг, ур чадвар эзэмшүүлэхэд оршино.
Компаний засаглалын тулгуур онол болон ойлголтууд, зарчмууд, бүрдүүлэгч элементүүд, оролцогчид, тэдгээрийн эрх ашиг, ашиг сонирхол, нөлөөлөгч хүчин зүйлүүд, тэдгээрийн нөлөөлөлийг судлаж, үндэсний болон олон улсын хэмжээнд мөрдөж буй хууль эрх зүйн орчны шаардлагад нийцүүлж, компаний засаглалын тэргүүн туршлагуудыг компаний түвшинд зохих хэмжээнд ашиглах онол, арга зүйд сургана. Компаний засаглалын үндсэн субъектууд болох хувьцаа эзэмшигчид, төлөөлөн удирдах зөвлөл, гүйцэтгэх удирдлагын харилцан хамаарал, ашиг сонирхолын зөрчлийг шийдвэрлэж буй олон улсын эрхзүйн болон практик зохицуулалтууд, компаний сайн засаглалыг хэрхэн бүрдүүлэх, засаглалын индексийг олон улсад хэрхэн үнэлж, хэрэглэж буй талаар онол, практикийн мэдлэг олгоно. Түүнчлэн, компаний засаглал нь компаний нийгмийн хариуцлага, бизнесийн ёсзүйтэй хэрхэн уялддаг, энэ чиглэлээр олон улсын төвшинд болон Монголд тулгарч буй онолын болон практик асуудлуудыг танилцуулна. Компаний засаглалыг сайжруулах талаар олон улсын байгууллагуудын баримталж буй бодлого, эрхзүйн болон сайн дурын шинжтэй зохицуулалтуудыг бусад улс орны компаниуд практикт хэрхэн хэрэгжүүлдэг хийгээд тулгарч буй асуудлуудын талаар оюутнуудад танилцуулна.
Компанийн засаглалын онолын орчин үеийн урсгал чиглэлүүд, олон улсын туршлага, ололтуудыг танилцуулж, эдгээрийг аж ахуйн нэгжийн түвшинд хэрэгжүүлэх, хувийн болон төрийн өмчийн компаниудын зохистой удирдлагын зарчим, үр дүнтэй үйл ажиллагааны талаарх мэдлэг, ур чадварыг оюутнуудад эзэмшүүлэхэд оршино.
