Бидний тухай
Багш ажилтан
Нийгэм улс төрийн эхийг орчуулах арга зүй болон онцлогийг онолын үүднээс судалж, Монгол болон Хятад улсын гадаад харилцаа, гадаад бодлого, хамтын ажиллагаа, эдийн засаг, гадаад худалдаа, боловсрол, эрүүл мэнд, соёл урлаг, аялал жуулчлал, зэрэг нийгэм эдийн засгийн холбогдолтой мэдээ мэдээллийг уншиж ойлгох, тоймлон тэмдэглэх, орчуулгын оновчтой арга хэрэглэн монгол, хятад хоёр хэлнээ үгийн сангийн болон хэл зүйн алдаа мадаггүй орчуулах чадвар дадалд суралцана.
Хятад, монгол хэлний хэвлэл мэдээллийн бичвэрийг орчуулах арга зүй болон онцлогийг онолын үүднээс судалж, нийгэм, улс төрийн сэдэвтэй бичвэрийг хоёр хэлний хэм хэмжээнд нийцүүлэн үгчлэн буюу утгачлан орчуулах чадвар дадал эзэмшүүлнэ.
Орчин цагийн хятад хэлний өгүүлбэр зүйн тогтолцоо, үг холбох өгүүлбэр зүйн тогтолцоо, ангилан авч үзэх нь, өгүүлбэр зүйн нэгжүүд, өгүүлбэрт ялгах нь, өгүүлбэрийн гишүүд, тэдгээрийн хэл зүйн онцлог болон илрэх хэлбэр, өгүүлбэрийн хэв шинжүүд, ангилах нь, энгийн ба нийлмэл өгүүлбэрийн бүтцийн онцлог, хэл ярианы үйлдлүүд ба өгүүлбэрийн үүргийн хувьд ангилах нь, хятад хэлний өвөрмөц өгүүлбэрүүд, үйлдүүлэх утга илрэх нь, өгүүлбэрийн гүн болон өнгөн бүтэц, өгүүлбэрийн утга зүй болон хэрэглээний талаарх онолын мэдлэг олж, өгүүлбэр зүйн задлан шинжлэл хийх чадвар, дадал эзэмшинэ.
Тус хичээл нь орчин цагийн хятад хэлний онолын цогц мэдлэгийг гүнзгийрүүлж, хятад хэлний өгүүлбэр зүйн тогтолцоог хэлний нэгж, тэдгээрийн харьцаа хамаарлын шүтэлцээнд авч үзэн, бүтэц, утга зүй, харилцаа болон үүргийн талаас судлах зорилготой. Хэлний өгүүлбэр зүйн түвшний үндсэн ухагдахуун ойлголтууд, өгүүлбэр зүйн задлан шинжилгээ хийх чадвар, дадал эзэмшүүлснээр өгүүлбэр зүйн нэгжүүд болон тэдгээрийн олон хувилбарыг орчин цагийн хятад хэлний хэм хэмжээнд нийцүүлэн хэрэглэх чадвар, дадал эзэмшүүлэх, хэлний түвшнүүдийн харилцан уялдааг ойлгож, хэлний бодит баримтыг хэл шинжлэлийн өнөөгийн хөгжлийн чиг хандлагыг харгалзан бие даан бүтээлчээр ойлгох чадварыг хөгжүүлэхэд чухал ач холбогдолтой юм.
Орчин цагийн хятад хэлний хэл зүйн тогтолцоо, хэл зүйн нэгж, тэдгээрийн харилцан хамаарал, хятад хэлний бүтээвэр хийгээд тэдгээрийг ангилах авч үзэх нь, хятад хэлний үг зүйн хэв шинж, үг бүтэх ёсон, үгийг айн хэв шинжээр ангилах нь, хятад хэлний үгсийн аймаг, тэдгээрийн хэл зүйн онцлог, утга зүй болон хэрэглээний талаар онолын мэдлэг олж, үг зүйн задлан шинжлэл хийх чадвар, дадал эзэмшинэ.
Тус хичээл нь орчин цагийн хятад хэлний онолын цогц мэдлэг олгож, хэлний нэгжүүдийг үг зүйн түвшинд задлан шинжлэх чадвар, дадал эзэмшүүлэх зорилготой. Хятад хэлний үг зүйн үндсэн хэв шинжийг нарийвчлан судалснаар хэлний бодит баримтыг хятад хэл шинжлэлийн хөгжлийн чиг хандлагыг харгалзан бие даан бүтээлчээр ухааран ойлгох чадварыг төлөвшүүлэн хөгжүүлэх, орчин цагийн хятад хэлний хэм хэмжээг эзэмшүүлэх, дадуулахад чухал ач холбогдолтой юм.
(Хятад хэлний үндэс II хичээлээр суралцагсад галиг үсэг болон хичээл дээр сурсан ханз үсэг, үг, өгүүлбэр зэргийг таньж мэдэж сурна. Ханзны түлхүүр үсгийн тусламжтайгаар толь бичгээс ханз үсэг олж сурах, харилцан яриа болон богино хэмжээний бичвэрийг уншиж ойлгох, энгийн зурвас, захиа захидал, богино тэмдэглэл мэдээллийг бичлэгийн зөв дараалалтайгаар бичиж сурах, оюутанд хамгийн энгийн мэндчилгээнээс эхлэн богино өгүүлбэр хичээлд хэрэглэгдэх үг хэллэгийг сонсгон ойлгож сургах, бусдын бодол санааг сонсож ойлгон өөрийн хүсэл бодлыг илэрхийлж чадах арга барилд тус тус суралцуулна. )
(Хятад хэлний үндсэн анхан шатны мэдлэгдээ тулгуурлан өдөр тутмын харилцан яриа, бичвэрийг сонсон уншиж, ойлгон өөрийн хүсэл бодлыг бусдад хялбараар дамжуулан, илэрхийлж чаддаг болно.)
Хятадын хэвлэл мэдээллийн төрөл ангилал, сэтгүүлзүйн тухай ойлголтыг олж авах, хэвлэл мэдээллийн хэл найруулга, үг зүй болон өгүүлбэр зүйн онцлог, хэвлэл мэдээллийн түгээмэл сэдвүүд, тухайлбал нийгэм улс төр, эдийн засаг, хот бүтээн байгуулалт, байгаль орчин экологи, соёл, боловсрол, залуучууд зэрэг сэдвийн эхтэй уншиж танилцан үндсэн үгийн сан эзэмшинэ.
Хятад хэвлэл мэдээллийн хэл найруулга болон хэл зүйн онцлогтой танилцаж, хэвлэл мэдээллийн үндсэн үгийн сан эзэмшиж өнөөгийн Хятад улсын нийгэм, улс төр, эдийн засгийн мэдлэг олно.Зорилгоо биелүүлэхийн тулд суралцагчдын өмнө нь эзэмшсэн хятад хэлний мэдлэгт тулгуурлан шинжлэх ухааны нарийвчилсан үг хэллэг болон хэвлэл мэдээллийн хэл найруулгад тулгуурлан судалгааны аргазүй, судалгааны асуудлуудыг нэгэн суурь мэдээлэл мэдлэг олох, нэгтгэн дүгнэх, мэдээлэл боловсруулах, тэдгээрийг эх хэлний мэдлэгтэйгээ уялдуулж сурахын дээр хэвлэл мэдээлэл, сэтгүүлзүйн ерөнхий ойлголт, ангиллын тухай мэдлэгийг эзэмшүүлэх нь энэ хичээлийн зорилт болно.
Үүрэг ба референсийн хэлзүй, Өгүүлэхүүнт нэгжийн бүтцийн онол, Тусах ба эс тусах чанар Цаг-байдал-баймжийн ай, Хэлзүйжих, Утгазүй болон үгийн сангийн үүргийн онол, Захирах, захирагдах харьцаа, Өгүүлбэрзүйн харьцаа, Хавсарсан өгүүлбэрийн онол бүлэг сэдвийн хүрээнд Өгүүлэхүүнт нэгжийн хүчтэй болон сул харьцаа, Өмнөх мэдээлээс урган гарах реферэнс, Референсийн зайн тухай ойлголт, Логик бүтэц болон өгүүлбэрийн үүргийн уялдаа холбоо, VP-ийн бүлэг, үүргийн ай, Үүргийн хэлзүйн судлал хэв шинжийн судлалтай холбогдох нь, Үйл үгээр илрэх үүргийн ай, Үгийн сангийн нэгж хэлзүйн ай илэрхийлэх чадамжтай болох нөхцөл, үе шат, Хэлзүйн харьцаа, Үйлдэгч, хүлээн авагч хоёр туйлын хооронд утгаар зүйл хуваах зарчим зэрэг аргазүйн чанартай ойлголтуудыг судлана.
Хэлний суурь шинж чанарыг тайлж тайлбарлахын тулд хэлний хэлбэрийг түүнийүүргээр нь тогтоох явдал байдаг. Энэ хичээлийг судласнаар хэлний бодот үзэгдлийг тайлж тайлбарлахдаа хэл ярианы үүслийн хийсвэр ойлголт талыг эрхэмлэх, энэ үүднээс тайлж тайлбарлах үндэслэлийг судлана.
Хятад хэлний хэл зүйн шинж чанар, хэл зүйн нэгж, үгийн аймаг, нэр үг, үйл үг, тэмдэг нэр, тэдгээрийн онцлог, хятад хэлний өгүүлбэрийн гишүүд, түүний ангиллын тухай нэгтгэн авч үзнэ.
Хятад хэлний хэл зүйн онолын анхан шатны мэдэгдэхүүнтэй болгох, яриа бичигт хэл зүйн дүрмийг зөв хэрэглэж сургах, хятад хэлний бусад хичээлийн үндэс суурийг зөв тавих.
Өдөр тутмын сонин сэтгүүл, телевизийн мэдээ зэрэг суралцагчдын өдөр тутмын амьдралтай нягт холбоотой бичвэрүүдийг уншиж ойлгох, энгийн зурвас, захидал, богино тэмдэглэл, мэдээллийг тухайн сэдвийн дагуу бичиж, зохион бичих чадварт суралцана.
Төрөл бүрийн сэдвээр өргөн хүрээнд харилцахад хэрэглэх 4000-аад үгийн баялаг сантай болох, үзсэн үг хэллэг, ханз үсэг, тэдгээрийн илэрхийлэх утга тус бүрийг зөв оноон хэрэглэж, нийгмийн бүхий л хүрээний сэдвийг уншиж ойлгож сурах, хувь хүний тухай асуултуудтай энгийн анкет, санал асуулгын хуудсыг бөглөж, олон нийтийн арга хэмжээнд энгийн бичгийн мэдээлэл хийж сурна.
