Бидний тухай
Багш ажилтан
Энэ хичээлээр боловсролын ёс зүйн асуудлууд, анагаахын ёс зүйн асуудлууд, мэдээллийн ёс зүйн асуудлууд, интернетийн ёс зүйн асуудлууд, бизнесийн ёс зүйн асуудлууд, нийгмийн ёс зүйн асуудлууд: нийгмийн хариуцлага ба ёс зүй, хүчирхийлэл ба ёс зүй, үл хүчирхийлэл ба ёс зүй, нийгмийн тэгш байдал ба жендэрийн асуудал, хүрээлэн буй орчны ёс зүйн асуудлууд: Байгалийг бид яагаад хайрлан хамгаалах ёстой вэ? Бүх амьтан тэгш эрхтэй юу? Хүнийг болон амьтныг хувилах нь зүй ёсонд нийцэх үү? Био ёс зүйн асуудлууд: Эвтанази ба ёс суртахуун, Үр хөндөлт ба ёс суртахуун, Генетик инженерчлэлийн ёс суртахууны тухай зэрэг олон асуудлыг судална.
Хэрэглээний ёс зүй хичээлийн зорилго нь хэрэглээний ёс зүйд суралцах нь бүх нийтийн үйл хэрэг болох талаар ухамсарлан ойлгох, хэрэглээний ёс зүйн асуудлаар таамагт шүүмж хийн задлан шинжилж, түүний өвөрмөц онцлогыг судлах, суралцагч бүр хэрэглээний ёс зүйн талаарх өөрийн мэдлэгээ өргөжүүлэн гүнзгийрүүлэх боломжийг олгохоос гадна хэрэглээний ёс зүй бол нийгмийн болон хувь хүний үнэт зүйл гэдгийг ойлгуулахад оршино. Хэрэглээний ёс зүйн холбогдох эх сурвалжууд, голлох үзэлтэй танилцсанаар нийгмийн харилцаанд ёс зүйтэй оролцох талаар тодорхой цэгцтэй мэдлэг, ойлголттой болно. Хэрэглээний ёс зүйг судалсанаар нийгмийн болон хувь хүний ёс суртахууны философид суралцаж, ялгаатай үзэл санаануудад бүтээлчээр шүүмжлэлтэй хандах чадвар, сэтгэлгээ, үндэслэгээ дэвшүүлэх, үзэл бодлоо ухаалаг илэрхийлэх чадвар дээшилнэ. Мөн нийгмийн болон хувь хүний амьдралын ёс суртахууны тулгамдсан асуудлыг олон талаас нь авч үздэг байх, мэдээллээс зөв сонголт хийдэг байх, мэтгэлцэх тодорхой чадвар эзэмшинэ.
Удиртгал энэхүү хичээлээр оюутнууд философийн үндсэн суурь асуудал руу нэвтэрч, философийн чухал сэдвүүдийг судалж, философи сэтгэлгээний түүхэн дэх томоохон сэтгэгчидтэй танилцана. Бодол төрүүлсэн харилцан яриа, хэлэлцүүлэгт идэвхтэй оролцсноор философийн үндэслэгээг задлан шинжлэх, шүүмжлэлтэй үнэлэх чадварыг эзэмшинэ. Энэхүү хичээл нь метафизик, танин мэдэхүй, ёс зүй, гоо зүй, нийгэм, улс төрийн философийг багтаасан философийн өргөн хүрээний салбаруудыг хамарна.
Бодит байдал гэж юу вэ? Түүнийг хэрхэн танин мэдэх вэ? Мэдэж буйгаа үнэн гэдгийг хэрхэн тогтоох вэ? Би хэн бэ? Яагаад сайн байх ёстой вэ? гэх зэрэг философийн гол асуултуудад хариулсан философичдийн үзэл баримтлалыг энэ хичээлээр судлах зорилготой. Философид суралцаж, ялгаатай үзэл санаануудад шүүмжлэлтэй, хүндэтгэлтэй хандаж, асуудлыг тал бүрээс шинжин, үндэслэлтэй шийдэл дэьшүүлэх, мэтгэлцэх чадварт сургадагаараа ач холбогдолтой.
Хичээлийн агуулга нь хоёр хэсгээс тогтох бөгөөд эхний хэсэгт улс төрийн сэтгэлгээний түүхийг Платон, Аристотелээс эхлэн, Макиавелли, Гоббс, Локк, Монтескьё, Руссо, Гольбах, Гегель, Марк нарын үзлээр төлөөлөн авч үзэх юм. Хоёр дахь хэсэг улс төр гэж юу болох, түүний үүсэл хөгжил, анги давхарга, улс төрийн зохион байгуулалтын мөн чанар, хэлбэр зэрэг болон эрх мэдэл, эрх чөлөө ба хариуцлага, улс төрийн соёл, глобальчлал, улс төрийн прогнозчлол гэхчлэн гол гол онолын асуудлуудыг авч үзэх юм.
Хичээлийн зорилго нь улс төрийн асуудалд философийн анализ хийж, улс төрийн талаар бие даасан үзэл бодолтой, үндэслэгээ нотолгоотой мэтгэлцэж чаддаг, улс төрийн философийн талаар суурь мэдлэгтэй иргэн хүн төлөвшүүлэхэд оршино.
Аргументын /үндэслэгээний/ онол, бодомжийн логик, дедуктив логик, формаль биш логикийн онолын суурь мэдлэг эзэмшинэ. Цэгцтэй, дэс дараатай сэтгэх чадвар, унших, сонсох, ярих, бичихдээ алдаагүй, зөв дүгнэлт хийх чадвар, логикийн хууль, дүрмүүдийн шаардлагыг сахин биелүүлэх чадвар, формаль биш алдаануудаас зайлсхийх, үндэслэгээг зөв тавих чадвар, дедуктив оюун дүгнэлтийг хэлбэрчлэн томъёолж зөв, буруу хэлбэрүүдийг ялган тогтоох зэрэг тодорхой чадвар эзэмшинэ. Эргэцүүлэл дэх зөв бурууг ялгах, нотлох, няцаах зэрэгт зөв үндэслэл өгөх рациональ хандлага төлөвшинө.
