Бидний тухай
Багш ажилтан
Удиртгал энэхүү хичээлээр оюутнууд философийн үндсэн суурь асуудал руу нэвтэрч, философийн чухал сэдвүүдийг судалж, философи сэтгэлгээний түүхэн дэх томоохон сэтгэгчидтэй танилцана. Бодол төрүүлсэн харилцан яриа, хэлэлцүүлэгт идэвхтэй оролцсноор философийн үндэслэгээг задлан шинжлэх, шүүмжлэлтэй үнэлэх чадварыг эзэмшинэ. Энэхүү хичээл нь метафизик, танин мэдэхүй, ёс зүй, гоо зүй, нийгэм, улс төрийн философийг багтаасан философийн өргөн хүрээний салбаруудыг хамарна.
Бодит байдал гэж юу вэ? Түүнийг хэрхэн танин мэдэх вэ? Мэдэж буйгаа үнэн гэдгийг хэрхэн тогтоох вэ? Би хэн бэ? Яагаад сайн байх ёстой вэ? гэх зэрэг философийн гол асуултуудад хариулсан философичдийн үзэл баримтлалыг энэ хичээлээр судлах зорилготой. Философид суралцаж, ялгаатай үзэл санаануудад шүүмжлэлтэй, хүндэтгэлтэй хандаж, асуудлыг тал бүрээс шинжин, үндэслэлтэй шийдэл дэьшүүлэх, мэтгэлцэх чадварт сургадагаараа ач холбогдолтой.
Зөвлөх мэргэжлийн ёс зүйн судлах зүйл, ёс суртахууны бүтэц, мөн чанар, ёс суртахууны нийгмийн үүрэг, ёс суртахууны үндсэн ойлголтууд, зөвлөх мэргэжлийн ёс зүйн онцлог, нийгмийн шаардлага. Зөвлөх мэргэжлийн ёс зүйн зарчмууд, зөвлөх мэргэжлийн ёс зүйн хэм хэмжээ, хүний үнэт зүйл, түүний төрлүүд, зөвлөх мэргэжилтний мэргэжлийн хариуцлага ба ёс суртахууны хариуцлага, ёс суртахууны манлайллын талаар судална.
Нийгэм хөгжихийн хэрээр мэргэжилтэнд тавигдах мэргэжлийн ёс суртахууны шаардлага нэмэгдэж байна Нийгмийн амьдралд зөвлөх мэргэжлийн ёс зүйн эзлэх байр суурь, нийгмийн харилцааг төлөвшүүлэх, тогтвортой хөгжлийг хангахад зөвлөх мэргэжлийн ёс зүйн гүйцэтгэх үүрэг, зөвлөх мэргэжилтний ёс зүйн хэм хэмжээ, баримтлах үндсэн зарчим, стандарт, шаардлага зэрэг асуудлаар тодорхой мэдлэг, чадвар, дадал эзэмшүүлэх зорилготой. Ёс зүйн үндсэн ойлголтуудад тулгуурлан зөвлөх мэргэжлийн ёс зүйн үндсэн мэдлэгийг эзэмшүүлснээр, өнөөгийн зөвлөх ажилтны ёс суртахууны харилцаа, ёс суртахууны ухамсрын төлөв байдалд үнэлэлт, дүгнэлт өгөх, түүнийг төлөвшүүлэх мэдлэг чадварыг олгоход энэ хичээлийн ач холбогдол оршино.
Ёс зүйн мэдлэгийг норматив, мета болон хэрэглээний ёс зүйн үндсэн агуулгын хүрээнд гол төлөөлөгчдийн үзэл баримтлалууд хийгээд эрхэм чанар, сайн, аз жаргал, үүрэг, сонголт гэх мэт үндсэн ойлголтуудын тусламжтайгаар олгоно. Сократ, Платон, Аристотель, Фома Аквина, Августин, Ж.Локк,И. Кант, Ж.Бентам, Ж.С.Милль, Айн Рэнд гэх мэт философичдын ёс суртахууны үзэл баримтлалыг танилцуулна. Мөн амьтны эрх, эвтанази, үр хөндөлт, хүрээлэн буй орчны ёс зүй гэх мэт хэрэглээний ёс зүйн нээлттэй асуудлуудыг авч үзнэ.
Ёс зүйн удиртгал хичээлээр ёс суртахууны философийн үндсэн баримтлал, гол ойлголт, онол, практикийн асуудлуудыг нөлөө бүхий философичдын үзлээр дамжуулан танилцуулна. Энэ хүрээнд ёс суртахууны зөв буруугийн хэм хэмжээг хэрхэн тогтоох вэ? Бид юуг зөв гэж үзэх ёстой вэ? Юу буруу вэ? Бид юу хийх ёстой, бас юуг хийх ёсгүй бэ?, хүний үйлдлийн зөв, буруу эсэхийг юу тогтоодог вэ, ёс суртахууны гол зорилго юу вэ? гэх мэт асуултуудын хариултыг ёс зүйн онолууд болон мета ёс зүй, хэрэглээний ёс зүйн агуулгад тулгуурлан тайлбарлана.
