Бидний тухай
Багш ажилтан
Мэдээлэл харилцаа холбооны технологи эрчимтэй хөгжиж буй өнөө үед их дээд сургуулиудад инновацийг нэвтрүүлэх нь зайлшгүй хэрэгтэй байна. Эдийн засгийн хамтын ажиллагаа хөгжлийн байгууллагаас явуулсан судалгаанаас харвал дээд боловсролын салбарт инноваци нэвтрүүлэх явц бусад салбарт нэвтрүүлэх үйл явцаас арай түлхүү явагдаж байна. Үүнтэй уялдан манай их дээд сургууль төгсөгчдөөс ажлын байран дээр дээд боловсролтой хүнд байх ерөнхий чадварт програм хангамжийг өдөр тутмын үйл ажиллагаандаа ашиглах чадвартай байхыг шаардаж байна. Бизнесийн болоод эрдэм шинжилгээ, судалгаа, боловсролын салбарт аль алинд нь мэдээллийн технологийн хэрэглээ улам бүр нэвтэрч, боловсронгуй болж байна. Үүнтэй уялдан сургалтыг сонирхолтой, оновчтой байдлаар зохион байгуулах олон боломж бий болсон бөгөөд тэдгээрийг ашиглан оюутны суралцах процесст дэмжлэг үзүүлэх, онолын ойлголтыг баталгаажуулах, сургалтын агуулгыг нэмэгдүүлэх боломж ихээр гарч байна. Тиймээс энэхүү судалгааны ажлаар Санхүүгийн эконометрик хичээлд ашиглагддаг болон ашиглах боломжтой програм хангамж, МХТ-ийг тодорхойлж харьцуулах, эдгээрийн үр нөлөөг судлах зорилгоор хийсэн бөгөөд тус хичээлийг судалсан оюутнуудаас асуулгын аргаар судалгаа авч, үр дүнг нэгтгэсэн. Сургалтад ашиглагдаж байгаа програм хангамжуудыг үндсэн болон сургалтын үйл ажиллагааг дэмжих гэж хоёр хуваан тус бүрт нь харьцуулан судалж, үнэлгээ өгсөн. Судалгааны үр дүнд МХТ-ийг хэрэглээг хичээлд нэмэгдүүлэх нь сурах үйл ажиллагааг дэмжээд зогсохгүй, оюутны тэгш оролцоог нэмэгдүүлэх, хичээлийг илүү сонирхолтой, ойлгомжтой болгоход их хувь нэмэр үзүүлдэг гэсэн үр дүн гарсан.
Маркетингийн стратеги нь бизнесийн үйл ажиллагааны орлого, ашгийг тодорхойлоход нөлөө үзүүлдэг, олон асуудлыг хамардаг чухал хүчин зүйл гэдгийг мэддэг ч тоон үзүүлэлтээр бизнесийн орлого, ашигт хэрхэн нөлөөлж байгааг тэр бүр тооцдоггүй, тайлагнадаггүй. Тэгэхээр энэ судалгааны ажлаар компанийн авч хэрэгжүүлж буй маркетингийн зардал нь санхүүгийн гүйцэтгэлийн үзүүлэлтүүд болох борлуулалт, үйл ажиллагааны зардал болон цэвэр ашигт хэрхэн нөлөөлдгийг судлах, улмаар урт хугацаанд компанийн хувьцааны үнэлгээ, нийт хөрөнгийн өгөөж болон өөрийн хөрөнгийн өгөөжид хэрхэн нөлөөлж байгааг тодорхойлох зорилго тавьсан. MХБ-ийн А болон Б индексэд багтсан компаниудын санхүүгийн тайлангийн үзүүлэлтүүдээс маркетингийн зардал борлуулалтын орлого, хөрөнгийн өгөөж, хувьцааны үнэлгээг өсгөхөд ямар нөлөө үзүүлснийг МХБ-ийн мэдээлэлд үндэслэн судалсан болно.
