Бидний тухай
Багш ажилтан
Гэрээний үүргийн зөрчлийн улмаас учирсан хохирлыг хэрхэн тодорхойлж буйг тандан судалсан үр дүнг танилцуулж, тодорхой санал дэвшүүлсэн.
Иргэний хуулийн дахь хөөн хэлэлцэх хугацааны эрх зүйн зохицуулалтыг шүүхийн практикт хэрхэн хэрэглэж байгаа судалж, шүүхэд хууль хэрэглээний нэгдмэл байдал тогтоогүй болохыг толилуулж, эрх зүйн зохицуулалтын зорилго, зарчим, хууль хэрэглэх арга зүйн хүрээнд хэрхэн хэрэглэвэл зохистой талаар санал дэвшүүлсэн. Тодруулбал, хариуцагч хариу эсэргүүцлийг хөөн хэлэлцэх хугацаанд үндэслээгүй байхад шүүх хөөн хэлэлцэх хугацаа дууссан үндэслэлээр нэхэмжлэлийг хэрэгсэхгүй болгож шийдвэрлэж байгаа асуудалд, гэрээний үүргийн хөөн хэлэлцэх дуусах нь үндэслэлгүйгээр хөрөнгөжих үүргийн харилцааг үүсгэх эсэх, үл хөдлөх хөрөнгөтэй холбоотой гэрээний үүргийн хөөн хэлэлцэх хугацаа талуудад нэгэн адил хамаарах эсэх асуудлыг хөндсөн болно.
Гэрээний эрх зүйн харилцаанд оролцогчид мөнгөн төлбөрийн үүргийг гадаадын мөнгөн тэмдэгтээр гүйцэтгэхээр тохиролцож, улмаар төлбөр гүйцэтгэх хугацаа болохоос өмнө төгрөгийн гадаад валюттай харьцах ханш өссөн эсхүл буурсан нөхцөлд мөнгөн төлбөрийн үүргийг аль үеийн ханшийг үндэслэн гүйцэтгэх вэ гэдэгт нэг мөр хариулсан шүүхийн практик төлөвшөөгүй байна. Монгол Улсын шүүхийн практикт 2002 оны Иргэний хуулийн 218 дугаар зүйлийн 218.1 дэх хэсэг нь “Монгол Улсын мөнгөн тэмдэгт төгрөгийн гадаад валюттай харьцах ханшийг зохицуулсан зохицуулалт бус төгрөгийн өөрийнх нь худалдан авах чадварын өсөлт, бууралттай холбоотой” гэж тайлбарлахын зэрэгцээ “Монгол Улсын мөнгөн тэмдэгт төгрөгийн гадаад валюттай харьцах ханшийг зохицуулсан зохицуулалт мөн” гэж үзэх шүүхийн практик ч зэрэгцэн оршиж байна. Энэхүү өгүүллээр дамжуулан шүүхийн практикт тулгамдаж буй дээрх хууль хэрэглээний нэгдмэл бус байдалтай холбоотой асуудлыг шүүхийн шийдвэрт тулгуурлан гарган ирж, 2002 оны Иргэний хуулийн 218 дугаар зүйлийн 218.1 дэх хэсгийн зохицуулалтын зорилго, чиг үүргийг түүхчлэх, гадаадын зарим улсын эрх зүйн зохицуулалттай харьцуулан, системийг тайлбарлан тус зохицуулалтын зорилго, чиг үүргийг тодорхойлох гэж оролдсон болно.
Санхүүгийн хэрэглэгчийн хувийн эрх зүйн хамгаалалтын асуудлын хүрээнд зээлийн үйлчилгээ үзүүлэгч аж ахуй эрхлэгчийн хэрэглэгчтэй байгуулж буй зээлийн гэрээнд ашиглаж буй стандарт нөхцөл, түүнээс үүссэн маргааныг шийдвэрлэсэн шүүхийн шийдвэрт тулгуурлан санхүүгийн хэрэглэгч болох зээлдэгчийн хувийн эрх зүйн хамгаалалтын өнөөгийн байдалд дүгнэлт хийсэн болно.
