Бидний тухай
Багш ажилтан
Олон улсын бакалаврын түвшин болон ерөнхий боловсролын ахлах ангийн байгалийн ухааны чиглэлийн хичээлд их дээд сургуулийн судалгааны лабораторийг ашиглах, хэрэглээг нь нэвтрүүлэх болжээ. Энэхүү ажил нь их сургууль ба ижил төрлийн байгууллагын судалгааны лабораторийг суурь мэргэжлийн түвшин, тэр байтугай ерөнхий боловсролын сургуулийн ахлах ангийн байгалийн ухааны чиглэлийн хичээлд ашиглах буюу нэвтрүүлж болох тухай, энэ тохиолдолд лабораторийн ажил ямар байх тухай, жишээ болгон өнөөгийн их сургуулийн бакалаврын түвшний мэргэжлийн хичээлд хэрхэн туршиж байгааг тодорхой лабораторийн ажлаар харуулах зорилготой байв. Үүний тулд хэд хэдэн судалгааны лабораторийг хэрэглэсэн нь “Оптик спектр судлалын лаборатори” -д дээж бэлтгэх, оптикмикроскоп, нил улаан туяаны спектрометр болон рентген дифрактометрийн лабораториуд байв. Энэхүү хөтөлбөр нь их сургуулиас ерөнхий боловсролын сургуулийн багш болон сурагчидтай хамтын ажиллагааг эхлүүлж, цаашид судалгааны лабораторийг ерөнхий боловсролын сургуулийн анги танхимд бодитоор бий болгох хэтийн ирээдүйд алхам болох юм.
Цахим хичээлийн үед сургалтын технологийг баяжуулан шинэчлэх шаардлага бий болсон. Загварчлал, симуляцийн технологи ашиглан үүнийг хямд төсрөөр хурдан шуурхай хэрэгжүүлэх боломжтой. Бид цар тахлын үеэр буюу 2020-2021 улиралд ерөнхий болон мэргэжлийн суурийн физикийн курсыг цахимаар заахдаа, хичээлийн агуулгаас тодорхой сэдвүүдийг сонгон авч харгалзах виртуал загваруудыг өөрсдөө бие даан бүтээж, сургалтын үйл ажиллагаандаа ашиглав. Мөн эдгээр загвараа сургалтын зориулалт бүхий жишиг загваруудтай харьцуулж үзсэн болно. Загварчлалын технологи ашиглан бүтээсэн сургалтын хэрэглэгдэхүүн нь физикийн үзэгдэл юмсын талаарх оюутан сурагчийн төсөөллийг визуал аргаар бататгаж, ойлгоцыг нь нэмэгдүүлэх; сургалтын эвристик арга зүйг (туршиж үйлдэнгээ өөрөө өөрийгөө сургах) хэрэгжүүлэх; цахим болон зайны сургалтыг зардал багатайгаар сонирхолтой хэлбэрээр өрнүүлэх зэрэг давуу талтай гэж үзэж байна.
Ковид-19 цар тахлын үед зайны, цахим сургалтын хэрэгцээ үлэмж нэмэгдэж, нөхцөл байдалд тохирсон сургалтын шинэ хэрэглэгдэхүүн хөгжүүлэх хэрэгцээ шаардлага эрс нэмэгдсэн. Энэ өгүүлэлд бид, сургалтын зорилгоор тогтмол гүйдлийн соронзон орны 3 хэмжээст (3D) компьютер загварыг бүтээх үйл явц, бүтээсэн загварыг физикийн сургалтын хэрэглэгдэхүүн болгон ашиглах боломжийн талаар дурдав. Тогтмол гүйдлийн соронзон орныг тооцоолохдоо, ерөнхий тохиолдолд аналитик шийдгүй Био-Саварын хуулийн интеграл томъёог тоон аргаар ойролцоолж бодуулдаг. Бид тооцоог геометрийн тэгш хэмтэй шулуун, тойрог хэлбэрийн дамжуулагчийн гүйдэл тус бүрийн хувьд хийж соронзон орны 3 хэмжээст дүрслэл (хүчний шугам) үйлдсэн. Түүнчлэн, хавтгай дээрх дурын хэлбэртэй дамжуулагчийн гүйдлийн соронзон орныг тооцоолж 3 хэмжээст дүрслэл үйлдэх програм боловсруулав. Тооцоог Python хэл дээр, 3D график дүрслэлийг OpenGL/WebGL технологи, сплайн-функц ашиглан хийв. Тооцоо, загварчлал үйлдэхэд ашигласан процессор: Intel i7 Quad Core, 2.3 GhZ, 16 Gb RAM.
